آج کیا پکائیں !!!

نسرین فاطمۃ نے 'پکوان' کی ذیل میں اس موضوع کا آغاز کیا، ‏3 ستمبر 2014

  1. نسرین فاطمۃ

    نسرین فاطمۃ رکن

    مراسلے:
    531
    ہم خواتین ہر روز اس مسئلہ سے دوچار ہوتی ہیں کہ آج کیا پکایا جائے جو بڑے اور بچے سب شوق سے کھالیں لیکن سب کے مشوروں سے بننے والی ڈش بھی کسی نہ کسی کو ناپسند ہوجاتی ہے یہ ایک تھریڈ بنایا گیا ہے جس میں سب خواتین اپنی اپنی بنائی ہوئی ڈشز شئیر کریں گی اور اس طرح دوپہر اور رات کے کھانوں کے انتخاب میں آسانی ہوجائیگی
    آج میں جو ڈش بنارہی ہوں دوپہر کے کھانے میں اس کا نام ہے۔
    ہرے مصالحے کا دھواں دار گوشت

    اجزاء
    گوشت بکری یا گائے کا ۔۔۔۔۔۔آدھا کلو
    پیاز ۔۔۔۔دو عدد درمیانی سائز کی
    ایک گٹھی پودینہ کی
    ایک گھٹی ہرے دھنیے کی
    دہی ۔۔۔۔۔۔ ایک پاؤ
    پسی لال مرچ ۔۔۔۔۔ ایک چمچ
    نمک۔۔۔۔۔۔۔ حسب ذائقہ
    ادرک ۔۔۔۔۔ ایک چمچ پسا ہوا
    لہسن ۔۔۔۔۔ ایک چمچ پسا ہوا
    گرم مصالحہ ۔۔۔۔پسا ہو آدھا چمچہ
    کوکنگ آئل ۔۔۔۔۔ ایک بڑا چمچہ
    ترکیب
    تمام مصالحوں کو دہی میں شامل کرکے گرائینڈ کر لیں اور پھر گوشت میں شامل کر کے دیگچی میں ڈال کر چولھے پہ چڑھا دیں درمیانی آنچ پہ پکائیں جب پانی خشک ہو جائے تو بھوں لیں اور پھر بھوننے کے بعد تھوڑا پانی شامل کردیں اب ہلکی آنچ پہ دم ہونے دیں ایک کوئلہ چولھے میں ہی سلگا لیں اور اس کوئلہ کو کسی جست کی چھوٹی سی کٹوری میں ڈال کر ایک قطرہ کوکنگ آئل ٹپکادیں اور فوری طور پہ دیگچی کے اندر اس کٹوری کو رکھ کہ اچھی طرح بند کردیں ۔اب چولھا بند کردیں اور تھوڑی دیربعد دیگچی سے اس کوئلہ والی کٹوری کو نکال دیں ۔مزیدار دھواں دار آج کے دوپہر کی ڈش تیار ہے میں نے تو تیار کرلی اب آپ کب بناتی ہیں مجھے
    ضرور بتائیے گا ۔
    • زبردست زبردست x 2
  2. نسرین فاطمۃ

    نسرین فاطمۃ رکن

    مراسلے:
    531
    ماش کی شاہ پسند دال


    اجزاء!
    ماش کی دال ۔۔۔۔۔۔ آدھا کلو
    ادرک لہسن پسا ہوا ۔۔۔۔۔ایک کھانے کاچمچ
    پسا ہوا گرم مصالحہ ۔۔۔۔۔۔۔ایک چائے کی چمچی
    کٹی ہوئی لال مرچ۔۔۔۔۔۔۔۔آدھی چمچ
    نمک ۔۔۔۔حسب ذائقہ
    پیاز۔۔۔۔۔۔ایک عدد
    ہری مرچ۔۔۔۔۔تین عدد
    ہرا دھنیا۔۔۔۔۔تھوڑا سا
    کڑی پتہ۔۔۔۔ 4سے 6 عدد
    کوکنگ آئل۔۔۔۔۔۔ کھانے کا ایک چمچ
    ترکیب
    دال کو صاف کر یں اور دھو کر پانی ڈالی کر چولھے پہ چڑھا دیں اب اس میں نمک کٹی لال مرچ اور ادرک لہسن ڈال دیں اور نرم ہونے تک پکنے دیں جب دال گل جائے اور پانی خشک ہو جائے تو چولھے سے اتار لیں اور ایک فرائی پین میں کوکنگ آئل ڈال کر گرم کریں اور باریک کٹی پیاز ڈال دیں ساتھ ہی کڑی پتہ اور ثابت گول مرچ دو سے تین عدد ڈال دیں اور دال میں بگھار لگا دیں اب پسا ہوا گرم مصالحہ اور ہری مرچ ہرے دھنیے سے گارنش کردیں مزیدار دال ماش تیار ہے ۔
    • زبردست زبردست x 1
  3. نسرین فاطمۃ

    نسرین فاطمۃ رکن

    مراسلے:
    531
    چکن بریانی


    جمعہ کے دن عموماََ ہر گھر میں بریانی ہی بنائی جاتی ہے اور جمعہ پڑھ کہ گھر آتے ہی گرما گرم بریانی کی خوشبو عید جیسا سماء مہیا کرتی ہے آج آپ سب بھی بریانی بنائیں میرے طریقے کے مطابق یقین جانئے آپ ہر جمعے کو یہی بنانا پسند کریں گے ان شاء اللہ ۔

    اجزاء
    سیلا چاول ۔۔۔۔ایک کلو ( کھلے منہ کے برتن میں دو گھنٹے پہلے بھگو دیں)
    چکن۔۔۔۔۔۔۔۔تین پاؤ
    پیاز ۔۔۔۔۔درمیانی دو عدد
    لہسن ادرک پسا ہوا۔۔۔۔۔ایک کھانے کا چمچ
    گرم مصالحہ۔۔۔۔۔۔ مکس ایک کھانے کا چمچ
    بادیاں کے پھول۔۔۔۔۔ 5 سے 6 عدد
    سونف ۔۔۔۔۔ایک چمچ
    ثابت دھنیا۔۔۔۔۔ایک چمچی
    آلو بخارے ۔۔۔۔آٹھ عدد
    املی کے دانے۔۔۔۔۔۔آٹھ سے دس عدد
    ٹماٹر درمیانے ۔۔۔۔۔۔۔6سے 8 عدد
    ہری مرچ۔۔۔۔۔۔۔۔6سے 8 عدد
    سرخ مرچ کٹی ہوئی ۔۔۔۔۔۔ایک چمچہ(آپ کمی بیشی کر سکتے ہیں )
    نمک۔۔۔۔۔حسب ذائقہ
    کوکنگ آئل ۔۔۔ایک کپ
    پودینہ۔۔۔۔۔۔۔۔ آدھی گھٹی
    چٹکی بھر زردے کا رنگ اور کیوڑا
    چٹکی بھر جائفل جاوتری۔
    ترکیب

    دیگچی میں کوکنگ آئل گرم کریں اور کٹی ہوئی پیاز براؤن کرکے نکال لیں اب اسی آئل میں ادرک لہسن ڈال کر بھونیں اور چکن شامل کر دیں اب گرم مصالحہ میں سونف بادیاں کے پھول اور ثابت دھنیا شامل کر کے موٹا موٹا کوٹ کر چکن میں شامل کردیں اور اچھی طرح بھون لیں جب چکن تیل چھوڑدے تو اب کٹے ہوئے ٹماٹر اور ہری مرچ شامل کردیں ساتھ ہی جائفل جاوتری املی آلو بخارے بھی ڈال دیں اور آدھا کپ پانی شامل کرکے تھوڑی دیر پکنے دیں تاکہ چکن اور ٹماٹر گل جائیں اب ایک کلو چاول میں دو کلو جتنا پانی دیگچی میں ڈال کر ابال آنے دیں اب بھیگے ہوئے چاول شامل کر کے پکنے دیں جب پانی ختم ہونے لگے تو چاول کو کفگیر سے چلا کر اوپر سے پودینے کی تہہ لگا دیں اور چٹکی بھر زردے کے رنگ کو پانی یا دودھ میں گھول کر بریانی پہ چھینٹے لگا دیں آدھی چمچی کیوڑا بھی شامل کر دیں اور ڈھکن ڈھک کر ہلکی آنچ پہ دم ہونے رکھ دیں دس منٹ بعد بریانی تیار ہے دہی کے رائتے اور سلاد سے جمعہ پڑھ کے مسنون طریقے سے کھائیں ۔۔
    • زبردست زبردست x 2
  4. نسرین فاطمۃ

    نسرین فاطمۃ رکن

    مراسلے:
    531
    قدیمی شامی کباب


    اجزءا

    گوشت بغیر چکنائی والا ۔۔۔۔۔ آدھا کلو
    ادرک لہسن پسا ہوا۔۔۔۔۔۔دو کھانے کے چمچ
    چنے کی دال۔۔۔۔۔۔۔ ایک پاؤ
    ثابت لال مرچ۔۔۔۔۔۔۔5 سے 6 عدد
    گرم مصالحہ ۔۔۔۔۔ایک کھانے کاچمچ
    نمک حب ذائقہ
    آلو ۔۔۔۔۔۔ 2عدد
    پیاز ۔۔۔۔۔۔ 2 عدد
    ہری مرچ۔۔۔۔۔4 سے 5 عدد
    پودینہ ۔۔۔۔۔۔ آدھی گھٹی
    انڈے ۔۔۔۔۔۔۔ 2 عدد
    کوکنگ آئل تلنے کے لئے
    ترکیب
    گوشت کو دھو کر دیگچی میں ڈال دیں اور اس میں نمک مرچ لہسن ادرک ، گرم مصالحہ اور پانی ڈال کر چولھے پہ چڑھادیں جب گوشت گلنے پہ آ ئے تو اس میں دال اور آلو شامل کر کے ہلکی آنچ پہ پکنے دیں جب گوشت اور دال اچھی طرح گل جائیں تو دیگچی کو اتار کر ٹھنڈا کرلیں اور چوپر میں ہر گز نہ پیسیں بلکہ سل پہ پیس لیں یا ڈنڈے کونڈے میں باریک پیس لیں اب اس میں باریک کٹی ہوئی پیاز ہری مرچ اور پودینہ شامل کر کہ گول ٹکیاں بنالیں اب پھینٹے ہوئے انڈے میں ڈپ کر کے درمیانی آنچ پہ تل لیں ۔
    ان شامی کبابوں کو املی کی چٹنی یا رائتے کے ساتھ مسنون طریقے سے سے نوش فرمائیں ۔
    نوٹ !! چوپر میں پیسنے سے گوشت کے ریشے ٹوٹ جاتے ہیں اور لذت کے ساتھ اس کی خوبصورتی میں بھی کمی آجاتی ہے ۔
    • زبردست زبردست x 1
  5. نسرین فاطمۃ

    نسرین فاطمۃ رکن

    مراسلے:
    531
    شملہ مرچ کا سالن مصالحے والا


    اجزاء
    لمبی باریک کٹی شملہ مرچ ۔۔۔ 3 عدد
    لہسن کے جوئے۔۔۔۔باریک کٹے 3 عدد
    کوکنگ آئل ۔۔۔۔۔ایک چمچ
    رائی ۔۔۔۔آدھی چمچ
    ہلدی پاؤڈر۔۔۔ایک چوتھائی چمچ
    پسی لال مرچ ۔۔۔۔آدھی چمچ
    ہری مرچ لمبائی میں کٹی ہوئی۔۔۔۔2 سے 3 عدد
    گرم مصالحہ۔۔۔آدھا چائے کا چمچ
    زیرہ پاؤڈر ۔۔۔۔ایک چمچ
    کڑی پتے چند عدد
    ترکیب

    پہلے ایک فرائی پین میں کوکنگ آئل گرم کریں اور اس میں رائی دانہ ڈال کر فرائی کریں اور پھر سلائس کیئے ہوئے لہسن کے جوئے اس میں ڈالیں اور اب لمبی کٹی شملہ مرچ اس میں شامل کر کے نمک بھی ڈال دیں اور ہلکی آنچ پہ فرائی کریں تقریباََ 6 سے 8 منٹ تک ۔اب اس میں لال مرچ پسی ہوئی ہلدی پاؤڈر گرم مصالحہ اور زیرہ پاؤڈر شامل کر کے اچھی طرح چمچے سے ملائیں اب اس میں چند کڑی پتے شامل کر کے 3 سے 4 منٹ پکائیں اور نمک وغیرہ چکھ کر پین کو چولھے سے اتار لیں اب اسے ڈش میں نکال کر بوائل چاول کے ساتھ سرو کریں بچے بڑے سب شوق سے کھائیں گے ان شاء اللہ
    • زبردست زبردست x 1
  6. نسرین فاطمۃ

    نسرین فاطمۃ رکن

    مراسلے:
    531
    پنیر کی بریانی

    آج جمعہ مبارک ہے آج کے دن بنتی تو ہمارے گھر بریانی ہے مگر آج ہم مختلف ذائقے کی بریانی بنائیں گے۔
    اجزاء
    سیلاچاول ۔۔۔۔۔۔ ایک کلو ایک کنی ابلے ہوئے
    پنیر سادہ۔۔۔۔۔۔۔ 200 گرام
    کوکنگ آئل۔۔۔۔۔۔ ڈیڑھ کپ
    زعفران۔۔۔۔۔۔آدھی چمچی
    میدہ ۔۔۔۔۔۔۔ ایک کپ
    چکن ۔۔۔۔۔۔۔ آدھا کلو
    دہی ۔۔۔۔۔۔۔ 250 گرام
    الائچی 6 سے 8 عدد
    لونگ ۔۔۔۔۔ 12 عدد
    ادرک ۔۔۔۔۔ ایک انچ کا ٹکڑا
    پیاز ۔۔۔۔ 2عدد
    نمک ۔۔۔حسب زائقہ
    ترکیب
    پنیر کے چھوٹے چھوٹے ٹکرے کر لیں اور میدہ کو پانی میں گھول کر اسے سخت کرلیں اور پنیر پر لپیٹ کر اسے آئل میں بھون کر نکال لیں اور اسی آئل میں چکن ڈال کر اسے بھون لیں اب دہی میں زعفران اور الائچی ملاکر گوشت میں شامل کر دیں اور تھوڑا مزید بھونیں اب اس چکن پر بھنے ہوئے پنیر کے ٹکڑے رکھ دیں ۔ چاول میں پیاز کے لچھے ادرک کی باریک قاشیں اور لونگ ،نمک شامل کر کے ایک کنی ابال لیں ابلے چاولوں میں ایک چمچہ سرکہ اور ایک چمچہ آئل ڈالنا نہ بھولیں اب ان چاولوں کو چکن اور پنیر پہ پھیلادیں اور ڈھکن بند کر کے دم پہ لگا دیں دہی کے رائتے اور سلاد کے ساتھ مسنون طریقے سے تناول فرمائیں ۔
    • زبردست زبردست x 1
  7. نسرین فاطمۃ

    نسرین فاطمۃ رکن

    مراسلے:
    531
    بینگن کا بھرتہ
    اجزاء
    صاف ستھرے گول بینگن۔۔۔۔۔۔4 عدد
    درمیانی پیاز ۔۔۔۔2 عدد
    ہری مرچ ۔۔۔۔4 عدد
    لال مرچ کٹی ہوئی ۔۔۔۔ آدھی چمچ
    نمک حسب ذائقہ
    سفید زیرہ ۔۔۔۔۔۔ آدھی چمچ
    ادرک لہسن پسا ہوا۔۔۔۔ ایک کھانے کا چمچ
    ٹماٹر درمیانے ۔۔۔۔۔۔ 4 عدد
    ہلدی۔۔۔۔۔ آدھی چمچ
    کوکنگ آئل ۔۔۔۔۔ 2 کھانے کے چمچ
    ترکیب
    سب سے پہلے بینگنوں کو دھو کر ایک پین میں پانی ڈال کر ابال لیں جب ابل جائیں تو انھیں ٹھنڈے پانی میں ڈالیں اور چھلکا پتلی چھری سے اتار لیں اب بینگن کے گودے کو میش کر کے ایک باؤل میں رکھ لیں اب ایک پین میں کوکنگ آئل ڈالیں اور
    اس میں زیرہ کا بگھار لگا کر ادرک لہسن کا پیسٹ ہلدی نمک اور لال مرچ ڈال کر خوب بھونیں جب 2 دفعہ اچھی طرح بھن جائے تو اس میں میش کیا ہوا بینگن کا گودا ڈال کر ٹماٹر بھی کاٹ کر ڈال دیں اور دھیمی آنچ پہ پکنے دیں جب ٹماٹر گل جائیں اور بینگن تیل چھوڑ دیں تو باریک کٹی پیاز اور ہری مرچیں ڈال کر دم لگا دیں تقریباََ دس منٹ کے لئے ۔اب ایک ڈش میں نکال کر اوپر سے ہرا دھنیا اور باریک کٹی ادرک سے گارنش کردیں اور لیموں چھڑک کر چٹخارے دار بینگن کا لطف اٹھائیں ۔۔
    • پسند پسند x 2
  8. نسرین فاطمۃ

    نسرین فاطمۃ رکن

    مراسلے:
    531
    قیمہ بھرے کریلے

    اجزاء
    قیمہ۔۔۔۔۔۔۔۔ آدھا کلو
    کریلے۔۔۔۔۔۔آدھا کلو بڑے سائز کے
    ادرک ۔۔۔۔۔۔ ایک چمچ پسی ہوئی
    لہسن۔۔۔۔۔۔ ایک چمچ پسی ہوئی
    کوکنگ آئل۔۔ڈیڑھ کپ ( کمی بیشی ہوسکتی ہے)
    نمک۔۔۔۔۔۔ حسب ذائقہ
    سفید زیرہ۔۔۔۔ ایک چمچ
    پیاز ۔۔۔۔۔۔۔ تین عدد
    املی۔۔۔۔۔۔۔ 10 دانے
    لال مرچ۔۔۔۔ 2 چمچ
    ہلدی۔۔۔۔۔۔آدھی چمچ

    ترکیب نمبر 1
    کریلوں کو ہلکا ہلکا چھیل کر لمبائی کے رخ کریلوں کو چیرا لگا کرنمک لگا کر آدھا گھنٹہ چھوڑ دیں ۔املی کو کٹوری میں تھوڑاپانی ڈال کر بھگو دیں ، اب پین میں آدھاکوکنگ آئل ڈالیں اور کٹی ہوئی پیاز ہلکی براؤن کرلیں اب پسی ہوئی ادرک ،لہسن ، نمک ،ہلدی،مرچ ڈال کر مصالحہ بھون لیں بھنتے ہوئے مصالحے میں سفید زیرہ اور املی بھی شامل کردیں اور پھر قیمہ ڈال کر ڈھکن ڈھک دیں کچھ دیر بعد قیمہ آئل چھوڑ دے گا پانی کے چھینٹے ڈال کر مزید بھونیں ۔اب ان کریلوں کو پانی سے اچھی طرح دھولیں اور اس میں قیمہ بھر کر دھاگہ لپیٹ دیں اور بقیہ تیل میں فرائی کرلیں ۔
    ترکیب نمبر 2
    درج بالا مصالحوں میں آدھی چمچ سونف،آدھی چمچ کلونجی اور آدھی چمچ میتھی دانہ بھی مصالحوں میں شامل کرلیں بنانے کی ترکیب یہ ہے کہ کریلوں کو چھیل کر درمیان سے چیرا لگا کر نمک لگا کر کچھ دیر چھوڑ دیں ، اور پھر پانی سے اچھی طرح دھو لیں اس طرح کڑواہٹ نکل جائیگی پھر آدھا کوکنگ آئل ڈال کر کریلوں کو احتیاط سے تل لیں اور الگ پلیٹ میں نکال لیں اب باقی تیل اس پین میں ڈال کر ادرک لہسن ڈال کر تھوڑا سا فرائی کریں پھر قیمہ شامل کردیں اب اس قیمہ میں نمک ،مرچ ،ہلدی سفید زیرہ،کلونجی سونف،میتھی دانہ،اور املی شامل کرکے پکنے دیں ایک کپ پانی بھی شامل کردیں تاکہ قیمہ گل جائے جب قیمہ گل جائے تو اسے بھون لیں اب پیاز ہری مرچ ڈال کر تھوڑی دیر دم لگا دیں اور پھر چمچ کی مدد سے تلے ہوئے کریلوں میں بھر کر دھاگہ لپیٹ دیں پین میں ڈال کر دس منٹ دم لگا دیں قیمہ بھرے کریلے تیار ہیں۔
    • زبردست زبردست x 1

اس صفحے کی تشہیر